ខុសពីហាងកាហ្វេនានាក្នុងរាជធានីភ្នំពេញ កាហ្វេឆ្មា ទើបតែបើកបានរយៈពេល ២ ខែ ផ្តល់បរិយាកាសថ្មីប្លែកដល់ភ្ញៀវដែលចូលចិត្ដចិញ្ចឹមសត្វរោមទន់ល្មើយគួរឲ្យថ្នាក់ថ្នម។ សំឡេង «ម៉េវ» លាន់ឮរងំពេញត្រចៀក ចាប់តាំងពីច្រកទ្វារចូល ខណៈហ្វូងឆ្មាដ៏គួរឲ្យស្រឡាញ់ជាច្រើនក្បាលដេករដូករណែលនៅលើតុកាហ្វេ និងដើរត្រាច់ចរដោយសេរីនៅខាងក្នុងហាង។ ក្រៅពីបរិយាកាសហ៊ុមព័ទ្ធសត្វចិញ្ចឹមរោមទន់ល្មើយ អតិថិជនក៏ចាប់អារម្មណ៍ក្លិនឈ្ងុយឈ្ងប់នៃកាហ្វេផងដែរ។