កង់រទេះគោ ដែលជាមធ្យោបាយអូសទាញដ៏ពេញនិយមកាលពីសម័យដើមប្រែក្លាយជាគ្រឿងលម្អយ៉ាងស្រស់អែបស្លាកយីហោហាងកាហ្វេកង់រទេះ និងនៅលើជញ្ជាំងបរិវេណខាងក្នុងហាង។ នៅលើជញ្ជាំងផ្ទៃរលោងក្បែរតុតាំងភេសជ្ជៈ គំនូរទឹកខ្មៅរំលេចរូបភាពកំពូលតារាចម្រៀងសំនៀងមាស លោកស៊ីន ស៊ីសាមុត អ្នកស្រី ប៉ែន រ៉ន និងអ្នកស្រី រស់ សេរីសុទ្ធា អមជាមួយឈ្មោះបទចម្រៀងជាភាសាខ្មែរ និងបារាំង។ បើទោះបីជារចនាប័ទ្មហាងទាំងមូលមិនឆ្លុះបញ្ចាំងពីស្ទីលរស់នៅរបស់ប្រជាជនខ្មែរក្នុងសម័យទសវត្សរ៍ ៦០ ឬ ៧០ យ៉ាងណាក៏ដោយក៏ភ្ញៀវនៅតែមានអារម្មណ៍នឹកឃើញនូវរឿងអតីតកាល ហើយអ្វីដែលបានអន្ទងចិត្ដខ្លាំងបំផុតនោះគឺ បទចម្រៀងរបស់កំពូលអធិរាជសំឡេងមាសបង្ហើរសំនៀងរណ្ដំជាប់នឹងត្រចៀក។