ಪುನೀತ್​ ಹಾಡಿಗೂ, ಗಣೇಶ್​ ನಟನೆಯ ‘ಬಾನ ದಾರಿಯಲಿ’ ಚಿತ್ರಕ್ಕೂ ಏನು ಲಿಂಕ್​?

‘ಗೋಲ್ಡನ್​ ಸ್ಟಾರ್​’ ಗಣೇಶ್​ ನಟನೆಯ ‘ಬಾನ ದಾರಿಯಲಿ’ ಸಿನಿಮಾದ ಟ್ರೇಲರ್​ ಬಿಡುಗಡೆ ಆಗಿದೆ. ಈ ಚಿತ್ರದಲ್ಲಿ ಗಣೇಶ್​ ಜೊತೆ ರುಕ್ಮಿಣಿ ವಸಂತ್​, ರೀಷ್ಮಾ ನಾಣಯ್ಯ ಮುಂತಾದವರು ನಟಿಸಿದ್ದಾರೆ. ಪ್ರೀತಂ ಗುಬ್ಬಿ ಅವರು ನಿರ್ದೇಶನ ಮಾಡಿದ್ದಾರೆ. ಟ್ರೇಲರ್​ ರಿಲೀಸ್​ ಕಾರ್ಯಕ್ರಮದಲ್ಲಿ ಗಣೇಶ್​ ಅವರು ಈ ಚಿತ್ರದ ಟೈಟಲ್​ ಬಗ್ಗೆ ಮಾತನಾಡಿದ್ದಾರೆ. ‘ಬಾನ ದಾರಿಯಲಿ..’ ಎಂದ ತಕ್ಷಣ ಎಲ್ಲರಿಗೂ ಪುನೀತ್​ ರಾಜ್​ಕುಮಾರ್​ ಅವರ ‘ಭಾಗ್ಯವಂತ’ ಸಿನಿಮಾದ ಸಾಂಗ್​ ನೆನಪಾಗುತ್ತದೆ. ಹಾಗಾದರೆ ಆ ಹಾಡಿಗೂ ತಮ್ಮ ಸಿನಿಮಾದ ಕಥೆಗೂ ಯಾವ ರೀತಿ ನಂಟು ಇದೆ ಎಂಬುದನ್ನು ಗಣೇಶ್​ ವಿವರಿಸಿದ್ದಾರೆ. ‘ನನಗೆ ಮತ್ತು ಪ್ರೀತಂ ಗುಬ್ಬಿ ಅವರಿಗೆ ಈ ಸಿನಿಮಾ ತುಂಬ ಸ್ಪೆಷಲ್​. ಇದು ಪ್ರೀತಿಯ ಬಗ್ಗೆ ಇರುವ ಸಿನಿಮಾ. ಯಾವ ಟೈಟಲ್​ ಅಂತ ಯೋಚಿಸುತ್ತಿದ್ದಾಗ ಪುನೀತ್​ ರಾಜ್​ಕುಮಾರ್​ ಅವರ ಹಾಡು ಕೇಳಿ ಈ ಶೀರ್ಷಿಕೆ ಆಯ್ಕೆ ಮಾಡಿಕೊಂಡೆವು. ನಮ್ಮ ಸಿನಿಮಾ ನೋಡಿದ ಬಳಿಕ ಈ ಹಾಡಿನ ಕೆಲವು ಸಾಲುಗಳು ನಮ್ಮನ್ನು ಕಾಡುತ್ತವೆ’ ಎಂದು ಗಣೇಶ್​ ಹೇಳಿದ್ದಾರೆ.